Oisterwijk

Condt sij eenen ijegelijcken want Dierick sone wijlen Marten Jan Theeusz. naegelaten weduwer wijlen ǁ Anna sijnre huijsvrouwe dochtere wijlen Gerit Elijas zijn tocht ende recht van tochten hem als ǁ hij sede toebehoirende in een huijs ende hoff met sijnen gronde ende toebehoirten ende erffenis daer aen liggende ǁ ende daer toebehoirende vier lopensaet lants oft daer omtrent begrijpende gelegen inde prochie van ǁ Oisterwijck ter plaetsen genoempt Berckel aen Dlock tussen erffenis der kijnderen Adriaen Laureijsz. ǁ aen beijden zijden streckende metten eenen eijnde aen erffenis der erffgenamen Gerits van Griecken ende ǁ metten anderen eijnde aende gemeijn strate, Noch in een stuck eckerlants genoempt de Maen met ǁ eenen busken daer teijnden aen liggende vijff lopensaet oft daeromtrent begrijpende gelegen ter ǁ plaetsen voirs. tussen erffenis der kijnderen Adriaen Laureijsz. aen beijden sijden, streckende metten eenen ǁ eijnde aen erffenis der erffgenamen Gerits van Griecken ende metten anderen eijnde aen erffenis ǁ jonckher Diericx Borchgreeff, Noch in een stuck weijvelts vierdalff lopensaet oft daeromtrent ǁ begrijpende gelegen ter plaetsen voirs. tussen erfenis der kijnderen Adriaen Laureijsz. aen deen sijde ǁ streckende voirt rontomme aende gemeijnt aldaer, Wettelijck opgedragen ende overgegeven hadde ǁ Martenen zijnen soone bij hem Diericken ende bijde voirs. Anna tsamen verweckt soe tot behoeff vanden ǁ zelven Marten als mede tot behoeff vanden anderen kijnderen sijns Diericx ende Anna voirgenoempt ǁ gelijck dat in schepenen l(ette)ren van Oisterwijck daer op gemaeckt volcomelijck begrepen staet ǁ soe sijn gestaen voir schepenen ondergescreven de voirs. Marten ende met hem Peter sone Pauwels ǁ Peters van Criecken als man ende momboir Oijken sijnre huijsvrouwe dochtere Diericx ende Anna ǁ voirgenoempt soe in dijer qualiteijt voir hen selven als oijck mede inden name ende van wegen den anderen ǁ kijnderen Diericx ende Anna voirgenoempt daer in Marten ende Peter ende met hen de voirs. Dierick ǁ hennen vadere voir geloeft ende hen sterck voir gemaeckt hebben, Ende hebben t voirs. huijs hoff ende ǁ erffenissen voirgenoempt wettelijck ende erffelijck vercocht Jannen soone wijlen Jan Ariensz. de Molder ǁ om in eenen erff recht te hebben ende te besitten, Gelovende de voirs. Marten ende Peter ende met ǁ hen de voirs. Dierick hennen vadere t voirs. huijs hoff ende erffenissen voirg. aen voirs. coopere te ǁ waren als men erffve schuldich is te waren ende allen commer calaingie ende aentael daer inne ǁ wesende den selven aft te doen gehelijcken Vuijtgenomen twee mudden roggen erffpachts den ǁ erffgenamen Jan Ariensz. tot Tilborch met drije jaeren achterstels alsnu t achter ende ǁ ombetaelt staende, Behoudelijck ofter ennigen commer meer op quame daer men tdezer tijdt ǁ met aft en weet dat men den zelven aen copere zal aen copen nae gemeijnen lantcoop, Getuijgen ǁ waeren hier over schepenen in Oisterwijck Gielis Goossens vander Borcht ende Adriaen ǁ Peter Peijnenborchs die henre zegelen in getuijgenisse hieraen hebben gehangen Opten ǁ sessthiensten dach februarij int jaer ons heren duijsent vijffhondert sess ende ǁ tnegentich

J. Hoevel