Tilburg

Willem soon wilnere Hessel Janssoon, als metten heere geordineerde momboor van Hessel Cornelis ǁ Marie ende Catheryne, bruers ende susteren, ommundige kynderen Joost soon wilner Hessel Jansse, daer hy Wil ǁ lem als momboor voorschreven in absentie van Adrianen soon wilner Geerit Beykens, der selver ommundiger kynderen ǁ toe siender in tegenwoordicheyt ende met consent van Joosten der selver ommundiger kynderen vader voorschreven ǁ hem sterck voor maecte ende gelooffde, heeft gelooft uuyten naeme van den selven ommundigen Anthonisse ǁ Jan Adriaens, ende Peeteren soon wilner Peeter Andriess, als deeckens ende directeurs van der gulde van ǁ Sinte Peeters aultair binnen der kercke van Tilborch, tot behoeff der selver gulde voorschreven, eenen ǁ jairlycken ende erffelycken chyns van twee carolus gulden, twintich stuvers Brabants, oft die weerde ǁ der selver in anderen goeden gancbaren gelde, voor elcken carolus gulden voorschreven te reeckenen, alle ǁ jaer te betalen op onser liever vrouwen dage Lichtmisse, ende daer aff die selve momboor voorschreven ǁ bekenden dat den tweeden chyns was vervallen, ende verschenen tot Lichtmisse lestvoorleden, Uuyt ende ǁ van eenen huys hoff, met synen gronde ende toebehoorte, ende uuyter erffenisse daer aen liggende ende ǁ daer toe behoorende onder heye weye ende saeylandt, acht loopensaet groot zynde, gelegen binnen ǁ der parochie van Tilborch, ter plaetse geheyten aen die Heydzyde byde Moerstraet, tusschen erffenisse ǁ Cornelis Pauwels aen die een zyde, ende tusschen erffenisse Geerits Peeter Wyten, aen ǁ die ander zyde, ende dat een eynde, streckende voor opte voorschreven Moerstraet, zoe hy seyde, Ende ǁ heeft gelooft Willem als momboor voorschreven, onder dat verbant der selver ommundiger kynderen ǁ goeden voorschreven hebbende ende vercrygende, den voorschreven chyns te waeren, gelyc men erffchynsen ǁ schuldich is te waeren, ende den voorschreven onderpant altyt goet seecker genoch ende waeldogende te maecken ǁ als voorden erffchyns voorschreven, daer jaerlycx uuyt te vergelden soe voorschreven staet, ende alle commer ǁ ende calaengie daer inne wesende altemael aff te doen, Dus soo sal den voors. chyns ter quytinge staen met ǁ achtendertichstalven gelycke carolus gulden, wesende dat vierendeel in die somme van een hondert ende ǁ vyfftich carolus gulden, daer mede dat die voorschreven gulde jaerlycx plach te heffen ende te beuren eenen ǁ erffpacht van sessentwintich loopen roggen, ende daer inne die selven ommundige kynderen voorschreven ǁ dat vierendeel plagen te gelden, achtervolgende den brieven, die die voorschreven gulde daer aff plach te ǁ hebben, ende hen vermelt ende affhendich gemaect zyn, doen die rebelle ons heeren des Coningx die kercke ǁ alhier tot Tilborch op den heyligen pinxterdach spolieerden, wel verstaende oft die ommundige kynderen ǁ voorschreven, oft henne nacomelingen in ennigen toecomenden tyde bevonden, dat den voornoompden pacht ǁ van sessentwintich loopen roggen met minder penningen te lossen waere, dan mette somme van een hondert ǁ ende vyfftich carolus gulden voorschreven, dat die selve ommundige kynderen ende henne nacomelinghen ǁ daer mede gestaen sullen voor soe veele hunnen vierendeel is aengaende, dus zoe sullen sy gehouden zyn ǁ tselve een halff jaer te vooren op te seggen ende wittelyck te vercondigen, als zy oft henne nacomelingen ǁ den voornoompden chyns afflossen ende quyten sullen willen, sonder argelist, Oorconden hebben hier ǁ over geweest scepenen in Tilborch ende in Goorlle Cornelis Claes sone van Gierlle ende Geerardt ǁ Henrick Borchmans sone, die den segel hoirs gemeyn schependomps desen brieve open aen hebben doen hangen ǁ Int jaer ons heeren duysent vyffhondert ende achtentseventich, opten tweentwintichsten dach in de ǁ meerte, folio 29.

P Berijs 1578

Dorsale aantekening:

2

Moer straet

Memorie om ǁ desen brieff te ǁ bevonnissen tot ǁ laste van Gerard ǁ Peters? voor ǁ het gebreck ǁ van .. achter? ǁ staende in ǁ trest [***] ǁ daertoe ge ǁ daeght Peter de ǁ Beer pro

Op de zegelstaart:

Lenaert van [***]