Tilburg

Jan zoen wilner Aerdt Reynbouts z., heeft geloeft als een principael schulder te gelden te geven ende wel te betalen ǁ brueder Niclaeus Mutssaerts priester pitanthier des goidshuys van Tongerloe, tot desselffs goidshuys behoeff ǁ Eenen jaerlycken ende erffelycken chyns van elff Carolus gulden twintich stuver off de weerde der selver in ǁ anderen goeden gelde gelyck ten tyde der betalinge gemeynlyck ganck hebben zal voer elcken karolus gulden ǁ voers. te rekenen, te vergelden een yegelyck jaer erffelyck op onsser liever vrouwen dach lichtmisse ende voer den ǁ iersten termyn ende dach van betalinghe tot lichtmisse nu naest comende vry van alle schoten beden thiende penningen ǁ ende andere lasten ende exactien die daer op souden moegen comen uuyt ende van huys hoff schuer backhuys ǁ metten gronde ende erffenisse daer aenliggende, ende daer toebehorende veerthien lopensaet oft daer omtrent ǁ begrijpende gelegen binnen der prochie van Tilborch ter plaetsse geheyten Eynthoven achter den hoevel aldaer tusschen ǁ erffenisse der erffgenamen Laureys Zwysen Hermans de Roy ende oick des convents van Tongerloe voerscr. deen ǁ syde ende tusschen erffenisse Willems vanden Gheyn dander syde streckende voer vander ghemeynder straten tot ǁ achter op erffenisse Laureys Aerdt Leyten zoe hy seyde, Ende heeft geloeft Jan voerscr., als principael schulder ǁ op hem ende op alle syn gueden die hij nu heeft, ende noch naemaels hebben ende vercrygen sal moegen, desen ǁ chyns van elff carolus gulden voers. te waren gelyck men erffchyns schuldich is te waren Ende den voerscreven ǁ onderpandt altyt goet zeker genoch ende waeldogende te maken, als voerden chyns voers. daer jaerlycks ǁ uuyt te vergelden zoe voers. staet ende alle commer ende calaingie daer inne wesende altemael aff te doen ǁ Met conditien ende vorwaerden toegedaen dat de voers. Jan ende syn naecomelingen den zelven chyns voerscr. ǁ altyt sullen moegen losschen, quyten ende vryen thennen schoensten, altyt tot lichtmisse, met tweehondert gelycke ǁ carolus guldens eens int gheheel ende teenemale oft ten vier malen ende telcken male met een gerecht vier ǁ de gedeelte tsamen metten achterstell alsdan ten achteren ende ombetaelt staende Behoudelijck dat ment ǁ aen halff jaer te voren op sal seggen, ende wettelyck vercondigen alsmen den voers. loss doen sall willen, ǁ sonder argelist Orconden hebben hier over geweest, Schepenen in Tilborch, ende in Goerle, Cornelis ǁ Claeussen van Ghierle, ende Jan Jan Lambrechtssen van Buerden, die den zegel hons gemeyns scependoms ǁ desen brieve, op en aen hebben doen hanghen int jaer ons heeren, duysent vyffhondert, twee ende tsestich ǁ den twelffste dach in februario.

[***] ǁ 1562

Dorsale aantekening:

Ick ondergescreven rentmeester van Tongerloo bekenne midts dese ǁ ontfangen te hebben van Adriaen Corstiaens van Bardwyck ǁ ende Henrick Peeters van Heyst momboiren vande kinderen wylen ǁ Jan Corstiaens van Bardwyck voor capitael ende sesse ǁ jaeren achterstels der rente int witte van desen naerder ǁ verhaelt die somme van tweehondert sessentsestich gulden ǁ Consenteere alsoo qualitate et supra inde cassatie van dese ǁ actum Tilborgh desen IIII january 1657 oirconde etcetera

Jan de Lae[t] ǁ 1657

In nonis folio 29 ǁ Tilborg XL ren[***] ǁ solvit Christianus Antonissen inden ǁ vos ende craen