Tilburg

Condt sij eenen ijegelijcken dat comen ende gestaen sijn geweest voor Scepenen ondergeschreven Cornelis ende Adriaen ǁ gebruederen soonen wilner Cornelis Peter Mutsarts ende hebben onder hen een erffmangelinge ende ǁ erffwiselinge gedaen ende gemaeckt als hijer nae volgende is overmidts welcker erffmangelinge ende ǁ erffwisselinge wille soe sal de voorgen. Cornelis van Adrianen sijnen broeder voors. hebben houden ende erfflijcken ǁ besitten een stuck ackerlants vijer dalff lopensaet min vijer roeijen off dair omtrent begrijpende gelegen inden ǁ prochie van Tilborch ter plaetsse geheijten die Stockhasselt aldair tusschen erffnijse Cornelis Thoniss. van Buerden ǁ metten kijnderen deen sijde ende tusschen erffnijse des voors. Cornelis Cornelis Peter Mutsarts hem van te vooren ǁ toebehoorende dander sijde ende deen eijnde streckende metten anderen eijnde aen erffnisse der kijnderen Goiarts ǁ Jan Reijnen zoo de voorgen. Adriaen seijde Op welcke stuck ackerlants voors. de voorgen. Adriaen op ǁ vertegen heeft tot behoeff Cornelis sijns bruers voorgen. met overgeven ende affgaen als dair toe ǁ behoorlijcken is ende heeft geloeft Adriaen voorgen. als principael schuldenaer op hem ende op alle ǁ sijn gueden hebbende ende vercrijgende Cornelisen sijnen brueder voors. dit voors. stuck ackerlants te waren ǁ loss ende vrij gelijck men loss ende vrij erven schuldich is te waren ende dese erffmangelinge ende ǁ dit verthijen overgeven ende affgaen voors. altijt vast ende stentich te houden ende in sijnen naem te ǁ doen houden sonder ennich wederseggen, ende alle commer ende calangie dair op comende altemael ǁ aff te doen, uuijtgenomen dat de voorgen. Cornelis hijer uuijt sal gelden het achtste gedeelte in ǁ achtentwintichstalff lopen roggen tsiairs erffpachts aen de Taeffele des Heijligen Geests binnen ǁ Tilborch te betalen noch een achtegedeelte in eenen lopen rogge tsiairs erffpachts aen den rectoir van ǁ Sinte Catherijnen altair inden kercken van Tilborch te betalen ende noch hijer toe het achtste gedeelte ǁ in twee stuver oft dair omtrent tsiairs erffchijns aenden geswoorenen van Tilborch te betalen, welcke ǁ pachten ende chijns voorgen. de voors. Cornelis alsoe gelden ende betalen sall ende geloeft heeft ǁ alsoe te gelden ende te betalen ten dagen ende termijnen dair toe geset ende geordineert zijnde ǁ datter den voorgen. Adrianen sijnen brueder noch sijnen erven ende naecomelingen dair aff nu noch ǁ nimmermeer hijnen commer noch last aff comen en sal dair voor alle sijn goeden havelijcke ǁ ende erfflijcke hebende ende vercrijgende verbijndende sonder argelist oirconden hebben hijer over ǁ geweest scepenen in Tilborch ende Goorl Adriaen Jan Peter Ghijben z. ende Jan Jan Lambrechtss. ǁ van Buerden die den segell hoirs gemeijn scependoms desen brieff op en aen hebben doen hangen. Int ǁ jair Ons Heeren duijssent en vijff hondert ende tsestich den veerthiensten dach in februario, folio 71

J. Berijs [***] ǁ 1560