Tilburg

Condt zy eenen yegelycken Dat gecompareert ende verschenen syn gweest voor Schepenen ondergeschreven Geerit Jan ǁ Claes Veldekens ende Cornelia zyn wittige huysvrouw dochter wylen Daniel Jan Reynen, wel by hennen verstande, gesont van lichaem, ende ǁ hen der vyff sinnen volcomen ende machtich zynde, ende hebben met goeder deliberatie ende voorraede in forme van testamente leste ǁ off uuyterste wille geordineert gewikt ende gemaect, dat die kinderen van Marie haerder beyder dochter, wedue wylen Niclaes ǁ zoon Sebastiaen Peeter Crillaerts, tsamen mette kinderen die zy alnouch in anderen wittelycken houwelycke sal mogen verwecken ǁ na die doot van haer Marie voorschreven, sullen hooft voor hooft succederen ende deelen in alle die goeden haeffelycke ende ǁ erffelycke daer zy Geerit ende Cornelia inne besterven zullen, ende die Marien haerder dochter tegen haere andere ǁ condividenten inne haerder vaders ende moeders goeden te deele bevallen zullen, ende die zy Marie achterlaten sal mogen ǁ welverstaende offer nae die doot van Geeryt ende Cornelia voors. ennige goeden der zelver Marien te deele bevallen ǁ geraecten vertiert, verandert, oft vercocht te worden in toecomenden tyde 'twaer bij haer oft bij ennige mans daer aen ǁ zy soude mogen geraecken anderen houwelycke te doen dat die voorkinderen daer inne voor hen contingente met andere ǁ goeden verleken ende voldaen sullen worden, zoe datse gelyck ende enen diep mette naekinderen der zelver Marien, als ǁ kinderen van eenen bedde geprocreert ende geboren zynde 'tsamen hooft voor hooft sullen scheyden ende deylen inde goeden ǁ van haer Geryt ende Cornelia, soe voorschreven staet, all zonder argelist Oorconden hebben hier over geweest Scepenen ǁ in Tilborch ende in Goirle Geerardt Henrick Borchmans sone, ende Michiel Willem Laurenssone die den zegel hoirs gemeyn ǁ schependoms desen brieve op en aen hebben doen hangen Int jaer ons heeren duysent vyffhondert ende sessentseventich Opten ǁ zeventhiensten dach inde maent van Julio folio 27

P. Berys ǁ 1576