Tilburg

Peeter soon wilnere Wouter Mutssaerts, Een huijs hoff metten gronde ende erffenisse daeraen liggende ende daer ǁ toe behoorende vijff ende een halff loopensaet oft daer omtrent begrijpende met alsulcken voorhooff, als den selven ǁ Peeter daervoor is hebbende gelegen binnen der prochie van Tilborch ter plaetse geheijten dat Eselven, aldaer ǁ tusschen erffenisse Andries Laureijs Jan Berthoutssoon daer eenen gemeijnen waterlaet tusschen beijde loopt deen ǁ zijde ende tusschen erfenisse Wouters Jan Daniels zoon dander zijde, ende deen eijnde comende voor opte gemeijn ǁ straet, ende hiertoe noch een stuck erffs anderhalff loopensaet oft daer omtrent begrijpende gelegen binnen der ǁ prochie ende ter plaetse voorschreven aldaer tusschen erffenisse Willem Cornelis Mutsaerts metten kinderen deen ǁ zijde, ende tusschen erffenisse Cornelis Jan Cornelis Spapen dander zijde ende deen eijnde streckende metten ǁ anderen eijnde aende gemeijnen straet geheijten die Ezel Vensche straet, soo hij zeijde, heeft hij wittelijcken ende ǁ erffelijcken vercocht overgegeven ende opgedraeghen, Cornelise soon Geert Vrancken van Gestel, met affgaen ende ǁ verthijen als dat gewoonlijcken ende recht is. Ende heeft gelooft Peeter vercooper voorgen. op hem selven ende ǁ op alle zijne goeden hebbende ende vercrijgende dat voorschreven huijs hoff metten gronde ende erffenisse ǁ daer aen liggende met oock den stuck erffs voors. te waren los ende van gelijc men los ende van erffven schul ǁ dich is te waren vuijtgenomen dat de voorschreven cooper hier vuijt sal gelden, Een mud roggen tsiaers erffpachts ǁ aen de kinderen van Jan Denijs Meijnaerts te betaelen, Noch alzulcken interest als men van de capitale penningen ǁ van vijffenveertich carolus gulden eens aen de taeffele des heijligegeests alhier jaerlijcx schuldich is te be ǁ talen, ende daertoe te onderhouden sheeren schouwe van der heijninge ende van den waterlaet, soo men die ǁ van ouden tijden schuldich is, ende behoort te onderhouden, Belovende voorts dit vercoopen overgeven ǁ opdragen affgaen ende verthijen voorschreven altijt vast ende stentich te houden ende in sijnen naem te ǁ doen houden sonder ennich wederseggen ende allen anderen commer ende calaengie daer meer op comende ǁ altemael aff te doen den selven, Oorconden hebben hier over geweest scepenen in Tilborch ende in Goirle ǁ Jan Aert Reijnbouts sone, Cornelis Claes sone van Gierlle, ende Geerardt Henrick Borchmans zone die den seghell ǁ hoirs gemeijn schependoms desen brieffve op en aen hebben doen hangen, int jaer ons heeren duijsent ǁ vijffhondert ende vijffentsestich, opten ijersten dach inde meerte, folio 62

Dorsale aantekening:

Peter soon wilner Wouter Mutssaerts ǁ [huis etcetera ǁ te Tilburg, aen t Eselsven