Tilburg

Ghijsbrecht soen  wilner Jan Laureijs soen als man ende momboir Kathelijnen sijns wijfs, Jan soen wilner Jans ǁ van Son als man ende momboir Dinghen sijns wijfs ende Henrick soen wilner Jan Laureijs soen als man ende momboir ǁ Adrianen sijns wijfs dochteren wilner Jacob Peter Aelwijns drie mudden roggen ende twee lopen roggen jairlijcx ǁ ende erffelijcx pachts vuijt ende van eenen erffpacht van seven mudden roggen ende thien lopen roggen jairlijcks ǁ ende erffelijcx pachts, erffelijck ende alle jair te ghelden ende te betalen op onser liever vrouwen dach lichtmisse ǁ vuijt ende van eenen huijs hoff ende schuer met sijnen gronde ende toebehoerten in alder groetten ghelijck dat ǁ aldaer ghelegen is, inder prochien van Tilborch ter steden geheiten Corvel, in die Maen tusschen die ghemeijn straet ǁ den Berckdijck ghenoemt deen sijde ende tusschen erffenis Gheertruijt die wedue Gherit Korstiaens d'ander zijde ǁ Item noch vuijt ende van drie verscheiden stucken lants bijsonder ghelegen ende dair ien gherekent metter ǁ maten ghedragende tsamen vier ende twintich lopensaet of daer omtrent begrijpende ghelegen inder prochien ǁ van Tilborch, dat een stuck ghelegen achter Corvel, geheijten Meijnen velt tusschen erffenisse Eelen Peter Eelkens deen ǁ sijde, ende tusschen erffenisse  Enghel die wedue Wouter Jacobs metten kijnderen ende Sijmon van Zon dander zijde ǁ Item dat ander stuck ghelegen bij die Corvelsche moelen in die Schijve tusschen erffenisse Jan Jan Korstiaens soen ǁ ende Aert Peter Peijmans soen deen zijde ende tusschen erffenisse Peter Lemans met meer anderen erven dander ǁ zijde, Item dat doide stuck lants is ghelegen achter Corvel met eenen houtwass tot eenen busken dair ǁ aenleggende geheijten dat Loo, off den Hasen acker tusschen erffenisse Hubrecht Lemans deen sijde ende tusschen erffenisse ǁ die wedue Gherit Willem Bacx met haren kijnderen ende Wouter Michiel Quaps dander zijde ende welck ǁ seven mudden roggen ende thien lopen roggen erffenisse voers. Jan soen wilner Jansz. van Son erffelijcken vercoft ǁ overghegeven ende opghedragen heeft Jacob Peteren Aelwijns ghelijck dat in schepenen letteren van Tilborch dair ǁ op ghemaect volcomelijcker begrepen is Hebben sij wittelijck ende erffelijck overghegeven ende opghedragen ǁ Peteren soen wilner Jacob Peter Aelwijns te samen met allen scepenen brieven ende voerwairden mentie dair aff ǁ makende ende ghewach doende ende met allen den recht hen enichsins dair in toebehorende met affgaen ǁ ende verthien als dat behoerlijck ende recht is, ende hebben gheloeft Ghijsbrecht, Jan ende Henrick voirs. ǁ op hen ende op allen hoer gueden hebbende ende vercrijghende, dit overgheven opdragen affgaen ende ǁ verthien voirs. den voerg. Peteren altijt vast ende stendich te houden sonder enich weder seggen, Ende ǁ allen commer ende calangie daer in wesende van hoeren wegen altemael aff te doen den selven orconden ǁ hebben hier over gheweest scepenen in Tilborch ende Goirle Jan Berijs Eelkens.  ende Bastiaen Peter Rubbens ǁ soen, die den seghel hoers ghemeijns scependoms desen brieve open aen hebben doen hangen int jair ons ǁ heeren dusent vijffhondert tweentwintich den sevenentwintichsten dach in januario

Dorsale aantekening:

Peter Jacop Aelwijnss.